ناس كتيرة دايما بتشتكي من صداع في نص واحد بس من دماغها مش بتعرف ده إي ولا تعالجه إزاي ؟
كتبت وفاء سليمان محمد 👇
ناس كتيرة دايما بتشتكي من صداع في نص واحد بس من دماغها مش بتعرف ده إي ولا تعالجه إزاي ؟ خليني اقولك مبدئيا ان النوع ده من الألم بنسميه الصداع النصفى
فتعالي نعرف يعني إي صداع نصفي ؟و إي فرقه عن الصداع العادي ؟و أعالجه إزاي؟
أول حاجة لازم نعرف إن في أنواع كتير للصداع بتختلف في شكلها و أسبابها و في منها بيكون بيكون بسبب أمراض تانية زي البرد و الجيوب الأنفية
والصداع النصفي من أكتر الحاجات اللي وجعها بيكون صعب شوية و بيعاني منه كتير من المرضى
أسبابه مش بتبقى حاجة محددة بس بشكل أساسي الضغط العصبي و التوتر و قلة النوم وعدم انتظامه
طب أعرف منين إني مريض صداع نصفي ؟
في الغالب مش بنعرف نفرق الصداع النصفي عن صداع الجيوب الأنفية
لكن في الصداع النصفي بيكون الوجع ورا عين واحدة و شامل نص الدماغ و مصاحب ليه أحساس بالغثيان وفي بعض الأوقات قئ و هتحس إن الوجع بيزيد مع الوقت و مع أي مجهود بدني
و أغلب مرضي الصداع النصفي بتعاني من حساسية تجاه الضوء و الضوضاء و الروائح القوية
و طبعاً ده على عكس صداع الجيوب الأنفية اللي بيكون مصاحب ليه أفرازات خضراء من الأنف وعدوي الجيوب الأنفية بشكل عام
طب إي العلاج ؟
العلاج الأساسي للصداع بيكون المسكنات لكن مينفعش نزود عن ٣ أيام في الأسبوع و بيكون تحت إشراف مختص ؛لكن في بعض التعليمات اللي هتساعدك و مهم تعرفها :-
لو في حدث معين( زي الإمتحانات أو ضغط شغل) بيجيبلك دايماً صداع نصفي خد المسكن قبله بيومين و بعد كده خلال وقت الحدث ده عشان يساعدك في تقليل الصداع و التحكم فيه
حاول تسيطر على الصداع من غير أدوية….إزاي ؟
نظم أكلك و نومك و حاول تاخد قسط كافي من النوم كل يوم
تجنب النوم المتقطع او المشتتات خلال فترة النوم
مارس تمارين تساعدك على التخلص من الضغط العصبي زي اليوجا
تجنب التعرض لكل الحاجات اللي بتسببلك الصداع النصفي أو بتزوده
خلال فترة الصداع ممكن تستعين بكمدات التلج على جوانب مقدمة الرأس و قلل الإضاءة و الأصوات في المكان اللي أنت موجود فيه وده هيساعدك تقلل الألم المصاحب للصداع بشكل كبير
#من_أسئلتكم
#دمتم_سالمين
